Հունգարիայում խորհրդարանական ընտրություններ են

Հունգարիայում կիրակի վաղ առավոտից մեկնարկել են խորհրդարանական ընտրությունները, որոնց հիմնական մրցակցությունը ծավալվում է վարչապետ Վիկտոր Օրբանի ղեկավարած «Ֆիդես» կուսակցության և Պետեր Մադյարի «Տիսա» քաղաքական ուժի միջև։ Ընտրատեղամասերը բացվել են Բուդապեշտի ժամանակով ժամը 06:00-ին և գործելու են մինչև 19:00-ը։

Ընտրողները քվեարկում են երկու ձևաչափով՝ միանձնյա ընտրատարածքում թեկնածուի և կուսակցության օգտին։ Խորհրդարանի 199 մանդատից 106-ը բաշխվելու են հենց միանձնյա ընտրատարածքներով։ Խորհրդարան անցնելու համար կուսակցությունները պետք է հաղթահարեն 5 տոկոսի շեմը։

Ընտրություններին մասնակցում է հինգ կուսակցություն։ Գլխավոր հավակնորդներից մեկը «Ֆիդեսն» է, որը ղեկավարում է երկիրը 2010 թվականից, իսկ մյուսը՝ 2020-ին ստեղծված «Տիսան»։ Աղբյուրի համաձայն՝ Պետեր Մադյարը 2024 թվականին հեռացել է իշխանական կուսակցությունից և անցել ընդդիմություն։ Բացի այդ, ընտրաթերթիկում ընդգրկված են նաև ձախակողմյան «Դեմոկրատական կոալիցիան», երգիծական Երկպոչ Շան կուսակցությունը և ծայրահեղ աջ «Մեր Հայրենիքը» (Mi Hazánk)։

Անկախ սոցիոլոգիական հարցումները կանխատեսում են «Տիսայի» վստահ հաղթանակ, մինչդեռ իշխանամետ հետազոտական կենտրոնները ենթադրում են, որ Օրբանի կուսակցությունը կկարողանա պահպանել խորհրդարանական մեծամասնությունը։ Հունգարական օրենքների համաձայն՝ ձայների հաշվարկը պետք է ավարտվի ոչ ուշ, քան ապրիլի 18-ը։