Պենտագոնի ղեկավարը կեղծ տեղեկություններ է տրամադրել Թրամփին․ WP

ԱՄՆ պաշտպանության նախարար Փիթ Հեգսեթը նախագահ Դոնալդ Թրամփին ներկայացնում է Իրանի դեմ գործողության ընթացքի մասին ոչ լիարժեք կամ մոլորեցնող տվյալներ, հաղորդում է The Washington Post-ը՝ հղում անելով աղբյուրներին։ Վարչակազմում որոշ պաշտոնյաներ կարծում են, որ նախարարի զեկույցները չափազանց լավատեսական են և կարող են սխալ պատկեր ստեղծել իրավիճակի վերաբերյալ։

Ըստ նույն աղբյուրների՝ Հեգսեթը հայտարարել է, թե ԱՄՆ-ն «ամբողջությամբ վերահսկում է Իրանի օդային տարածքը»։ Սակայն վարչակազմի ներկայացուցիչներից մեկը նշել է, որ այդ տեղեկությունը չի համապատասխանում իրականությանը, և նման հայտարարությունները կարող են մոլորեցնել ինչպես նախագահին, այնպես էլ հանրությանը։

Որպես հակափաստարկ՝ նշվում է վերջերս տեղի ունեցած միջադեպը, երբ Իրանում խոցվել է ամերիկյան F-15E կործանիչը։ Սա, ըստ աղբյուրների, ցույց է տալիս, որ Իրանը շարունակում է ռազմական վտանգ ներկայացնել ԱՄՆ զինծառայողների համար և կասկածի տակ է դնում Պենտագոնի ղեկավարի գնահատականները։

Ինքնաթիռը խոցվել է ապրիլի 3-ին՝ Իսֆահանից հարավ-արևելք ընկած հատվածում։ Անձնակազմի մեկ անդամը նույն օրը տարհանվել է, իսկ երկրորդը հայտնաբերվել է մոտ 36 ժամ անց՝ վիրավոր վիճակում, և տեղափոխվել բուժման՝ Քուվեյթ։