Ավինյանի հայրը հաղթեց դատարանում

Վերաքննիչ քաղաքացիական դատարանը ամբողջությամբ բավարարել է քաղաքապետ Տիգրան Ավինյանի հոր՝ Արմեն Ավինյանի բողոքը։ Այս մասին AuroraNews-ը տեղեկանում է Datalex համակարգից:

 Անցած ամռանը «Մայր Հայաստան» խմբակցության անդամ Գրիգոր Իսկանդարյանը դատարան էր դիմել և հաղթել քաղաքապետ Տիգրան Ավինյանի հորը՝ Արմեն Ավինյանին։

Հիշեցնենք, որ Ավինյանի հայրը լրատվամիջոցներից մեկի հարցման ընթացքում ասել էր, թե կարմիր գծերի գումարը պետք է 500 հազար դարձնեն, որպեսզի «ամեն համբալ չգա կայնի ստեղ` իրա գեղի Opel-ով»: Ավագանու անդամ Իսկանդարյանը դիմել էր դատարան։ Առաջին ատյանի դատարանը նրա հայցը մասնակիորեն բավարարել էր՝ 500 հազար դրամի փոխհատուցման պահանջից բավարարելով 250 հազարը։

Այնուհետև Ավինյանի հայրը առաջին ատյանի որոշումը բողոքարկել էր վերաքննիչ քաղաքացիական դատարանում։ Մարտի 20-ին վերաքննիչը՝ դատավոր Նարեկ Գաբրիելյանի նախագահությամբ, ամբողջությամբ բավարարել է քաղաքապետի հոր բողոքը։ Վճիռն ամբողջությամբ բեկանվել է, և Գրիգոր Իսկանդարյանի հայցն ընդդեմ Արմեն Ավինյանի ամբողջությամբ մերժվել է։

Որոշումն օրինական ուժի մեջ է մտնում հրապարակման պահից մեկ ամիս հետո և նույն ժամկետում կարող է բողոքարկվել Վճռաբեկ դատարան։