Ռեզա Փահլավին ներկայացրել է «անցումային Իրանի» հինգ տնտեսական նպատակները

Իրանի վերջին շահի որդի Ռեզա Փահլավին ներկայացրել է «անցումային Իրանի» հինգ տնտեսական նպատակները։

Տեսաուղերձում Փահլավին հայտարարել է, որ անցումային իշխանությունները կազատագրեն Իրանի տնտեսությունը ռազմական և կիսառազմական խմբավորումների, ինչպես նաև տնտեսական հանցագործների վերահսկողությունից։

«Բռնագրավված կամ գողացված ազգային հարստությունը կվերադարձվի և կփոխանցվի Իրանի քաղաքացիներին։ Պետական ​​ռեսուրսները նախատեսվում է վերաուղղել օտարերկրյա զինված խմբավորումների ֆինանսավորումից դեպի երկրի ենթակառուցվածքների, մասնավորապես՝ ջրամատակարարման, էլեկտրաէներգիայի և վառելիքի համակարգերի վերակառուցումը։

Անցումային համակարգը կվերացնի կոռուպցիան և մենաշնորհները՝ ազգային հարստությունը ուղղորդելով առողջապահության, կրթության զարգացմանը և աղքատության դեմ պայքարին։

Իրանի ամենամեծ հարստությունը ոչ թե նավթն ու գազն է, այլ նրա ժողովուրդը։ Խոստանում եմ ներդրումներ կատարել մարդկային կապիտալում, վերամիավորվել համաշխարհային տնտեսության հետ և վերականգնել երկրի տնտեսական կայունությունը, աճը և բարգավաճումը»։

Փահլավիի խոսքով՝ սրանք դատարկ խոստումներ չեն, այլ պարտավորություններ, որոնք նա մտադիր է իրականացնել Իրանի ժողովրդի հետ միասին։