Լուրերը մեկ տողով. Ռազմական և քաղաքական թեժ զարգացումներ՝ տարածաշրջանից մինչև Հայաստան

Անցած ժամվա լուրերը՝ հակիրճ և բովանդակային.

·   ԱՄՆ վարչակազմը թերագնահատել է Իրանի հնարավորությունները և դրա ազդեցությունը էներգետիկ շուկայի վրա։ Վաշինգտոնը պատրաստ չի եղել Հորմուզի նեղուցի հնարավոր շրջափակմանը, ինչը կարող է վտանգել համաշխարհային նավագնացությունն ու շուկաները։

·   «Հեզբոլլահը» պատրաստվում է պարտիզանական պատերազմի Իսրայելի հնարավոր ներխուժման դեպքում։ Զինյալները գործում են փոքր խմբերով և խուսափում են հեռախոսային կապից՝ վերահսկումից խուսափելու համար։

·   Պենտագոնը գնահատել է Բահրեյնում ԱՄՆ Հինգերորդ նավատորմի շտաբի վրա հարվածների վնասը՝ մոտ 200 միլիոն դոլար։ Հարվածների հետևանքով վնասվել են նաև Քուվեյթում գտնվող ամերիկյան ավիաբազայի մի շարք ենթակառուցվածքներ։

·   ԱՄՆ սենատոր Լինդսի Գրեմը հայտարարել է, որ Իրանի միջուկային հնարավորությունների զարգացումը կարող է լուրջ սպառնալիք դառնալ միջազգային անվտանգության համար։ Նրա գնահատմամբ դա կարող է փոխել տարածաշրջանային ուժերի հավասարակշռությունը և մեծացնել ճնշումը միջազգային հանրության վրա։

·   ԿԸՀ նախագահը հայտարարել է, որ որևէ քաղաքական ուժ կարող է չգրանցվել միայն այն դեպքում, եթե ինքն է չի կատարում օրենքով պահանջվող ընթացակարգերը։ Նա ընդգծել է, որ հանձնաժողովը գործում է միայն ընտրական օրենսգրքով սահմանված կարգով և չի զբաղվում քաղաքական մեղադրանքների գնահատմամբ։

·   Սննդամթերքի անվտանգության տեսչական մարմինը կասեցրել է Երևանի Խորենացի փողոցում գործող «Գրիլ․ամ» հանրային սննդի օբյեկտի գործունեությունը։ Ստուգման ընթացքում հայտնաբերվել են սանիտարահիգիենիկ պահանջների խախտումներ, և տնտեսավարողին տրվել է ժամկետ դրանք վերացնելու համար։

·   Հայոց ցեղասպանության թանգարան–ինստիտուտի տնօրեն Էդիտա Գզոյանը դիմում է ներկայացրել պաշտոնից ազատվելու համար։ Թանգարանից հայտնել են, որ առայժմ որևէ իրավական ակտ չի ընդունվել, և իրավիճակը չի մեկնաբանվում։