Լուրերը մեկ տողով. Հարված Թեհրանի հայկական թաղամասին. Զելենսկին՝ երրորդ համաշխարհային պատերազմի մասին

Անցած ժամվա լուրերը՝ հակիրճ և բովանդակային.

• Թեհրանի հայկական Մաջիդիե թաղամասում բնակելի շենքը հրթիռային հարվածի է ենթարկվել․ զոհեր չկան, սակայն որոշ բնակիչներ մնացել են փլատակների տակ։

• ԱՄՆ-ը կարող է շարժվել դեպի Իրանում ցամաքային ռազմական գործողություն իրականացնելու ուղղությամբ, հայտարարել է սենատոր Ռիչարդ Բլյումենթալը։

• Բլյումենթալը նշել է, որ Իրանի դեմ հնարավոր պատերազմի ֆինանսական և մարդկային ռիսկերի վերաբերյալ ավելի շատ հարցեր ունի, քան պատասխաններ։

• Իրանի նախագահի որդին հայտարարել է, որ նոր հոգևոր առաջնորդ Մոջթաբա Խամենեին անվտանգ է և չի վիրավորվել ռազմական գործողությունների ընթացքում։

• Իրանը Պարսից ծոցի երկրներին կոչ է արել հայտնել իրենց տարածքում գտնվող ամերիկյան և իսրայելական զինծառայողների թաքստոցների տեղակայումը։

• Իսրայելի նախագահ Իսահակ Հերցոգը հայտարարել է, որ ԱՄՆ-ին չեն դրդել Իրանի դեմ ռազմական գործողության։

• ԱՄՆ զինված ուժերը Հորմուզի նեղուցի մերձակայքում ոչնչացրել են Իրանի 16 ականադիր նավ։

• Հորմուզի նեղուցում բեռնատար նավը խոցվել է անհայտ արկով, ինչի հետևանքով նավում հրդեհ է բռնկվել և իրականացվում է անձնակազմի տարհանում։

• Սաուդյան Արաբիան հայտարարել է, որ խոցել է վեց անօդաչու թռչող սարք՝ դրանցից երկուսը Շայբա նավթային հանքավայրի ուղղությամբ։

• Ուկրաինայի նախագահ Վլադիմիր Զելենսկին զգուշացրել է, որ Ռուսաստանի և Իրանի ռազմական համագործակցությունը կարող է հանգեցնել երրորդ համաշխարհային պատերազմի վտանգի։

• Զելենսկու խոսքով՝ «Շահեդ» անօդաչուներում հայտնաբերվել են նաև ռուսական արտադրության բաղադրիչներ։

• Ռուսական «Россия» ավիաընկերության ինքնաթիռը Յակուտսկ թռչելիս աղետի ազդանշան է տվել՝ սրահի ապահերմետիկացման պատճառով և վերադարձել Կրասնոյարսկ։

• Գլխավոր դատախազության տվյալներով՝ 2018–2025 թվականներին Հայաստանի պետությանը վերադարձվել է շուրջ 773 միլիոն դոլարի գույք և դրամական միջոցներ։

• Երևանի ծառերի կենսունակության միջին տարիքը 40–50 տարի է, իսկ մայրաքաղաքում աճող շատ թեղիներ արդեն 70–80 տարեկան են։

• Մասնագետների խոսքով՝ վնասատու որդերն ու միջատները քայքայում են թեղիների բնամասը և նպաստում վնասատուների տարածմանը Երևանի կանաչ տարածքներում։