Լուրերը մեկ տողով. Սպառնալիքներ և ռազմական գործողություններ․ աշխարհը հետևում է Իրանի շուրջ ճգնաժամին

Անցած ժամվա լուրերը՝ հակիրճ և բովանդակային.

• Մերձավոր Արևելքում լարվածությունը շարունակվում է․ Իրանի հարվածի հետևանքով Բահրեյնում վնասվել է բնակելի շենք, կա զոհ և տուժածներ։ Իրանի հեղափոխության պահապանների կորպուսը հայտարարել է ԱՄՆ-Իսրայելական թիրախների դեմ գործողության հերթական փուլի մասին։

• ԱՄՆ նախագահը հայտարարել է, որ Իրանի դեմ պատերազմը կարող է շուտով ավարտվել և զգուշացրել է Թեհրանին պատասխան գործողություններից։ Նա նաև կտրուկ քննադատել է Իրանի նոր գերագույն առաջնորդի ընտրությունը և սպառնալիքներ հնչեցրել։

• ԱՄՆ զինված ուժերը Իրանի դեմ գործողության առաջին օրերին ծախսել են մոտ 5,6 միլիարդ դոլարի զինամթերք։ Միևնույն ժամանակ քննարկվում է Հորմուզի նեղուցի հնարավոր վերահսկողության հարցը։

• ԱՄՆ և Ռուսաստանի նախագահները հեռախոսազրույց են ունեցել՝ քննարկելով Իրանի շուրջ հակամարտությունը և Ուկրաինայի հարցը։ Կողմերը նշել են, որ անհրաժեշտ է իրավիճակի քաղաքական և դիվանագիտական կարգավորում։

• Իրանի նախագահը հայտարարել է, որ Թեհրանը պատրաստ է թուլացնել տարածաշրջանային լարվածությունը, եթե հարևան երկրները իրենց տարածքը չտրամադրեն Իրանի դեմ հարվածների համար։

• Brent տեսակի նավթի գինը նվազել է 90 դոլարից ցածր։ Շուկան շարունակում է արձագանքել Մերձավոր Արևելքում լարվածությանը և Հորմուզի նեղուցի շուրջ իրավիճակին։

• Հյուսիսային Կորեան քննադատել է ԱՄՆ-ի և Հարավային Կորեայի համատեղ զորավարժությունները և սպառնացել ուժեղ պատասխանով։ Փհենյանը հայտարարել է, որ հետևելու է իր հակառակորդների գործողություններին։

• Վրաստանում բնակիչներին վերադարձվել է շուրջ 1.2 միլիոն լարի՝ կոմունալ ծառայությունների ուռճացված վճարների համար։ Բողոքների հիմնական մասը կապված է եղել սխալ հաշվարկների և հնացած ենթակառուցվածքների հետ։

• Հայաստանի վարչապետը աշխատանքային այցով մեկնել է Ֆրանսիա՝ մասնակցելու Միջուկային էներգիայի գագաթնաժողովին։ Այցի ընթացքում նախատեսված են նաև հանդիպումներ եվրոպական կառույցների ներկայացուցիչների հետ։

• Հայաստանում առաջիկա օրերին սպասվում է առանց տեղումների եղանակ և ջերմաստիճանի աստիճանական բարձրացում։ Մարտի 14-ին հնարավոր են տեղումներ ձյան և ձնախառն անձրևի տեսքով։