Լուրերը մեկ տողով. Լարված նիստ Ազատ գյուղի գործով, նավթի գինը կարող է հասնել 150 դոլարի

Անցած ժամվա լուրերը՝ հակիրճ և բովանդակային.

• Ազատ գյուղի զինվորական կացարանի հրդեհի գործով դատական նիստը անցել է լարված մթնոլորտում։ Զոհված զինծառայողների հարազատները դժգոհել են մեղադրյալի պատասխաններից և պահանջել կրկին հարցաքննել որոշ անձանց՝ պնդելով, որ հարցերին լիարժեք պատասխան չի տրվել։

• Մերձավոր Արևելքում հնարավոր լայնածավալ հակամարտությունը կարող է կտրուկ ազդել համաշխարհային էներգետիկ շուկայի վրա։ Զգուշացվում է, որ Հորմուզի նեղուցի փակման դեպքում նավթի գինը կարող է հասնել մինչև 150 դոլարի մեկ բարելի համար։

• Ուկրաինան պատրաստվում է մասնագետներ ուղարկել Մերձավոր Արևելքում գտնվող ամերիկյան բազաները պաշտպանելու իրանական անօդաչու սարքերից։ Դա արվում է ԱՄՆ-ի դիմումից հետո՝ Շահեդ տեսակի դրոնների դեմ պայքարում աջակցելու համար։

• Ադրբեջանը հայտարարել է Թեհրանում իր դեսպանատան և Թավրիզում գլխավոր հյուպատոսության տարհանման մասին։ Համապատասխան հրահանգներ արդեն տրվել են դիվանագիտական ներկայացուցչություններին։

• Իրանի սահմանին մոտ 1500 ռուսական բեռնատարներ կուտակվել են Ադրբեջանի կողմից տարանցման փակման հետևանքով։ Բեռների մեծ մասը սննդամթերք է, որը կարող է փչանալ, ինչի պատճառով բեռնափոխադրողները կանգնել են մեծ ֆինանսական կորուստների վտանգի առաջ։

• Հնդկաստանում ՀՀ դեսպանությունը արտակարգ ռեժիմով կազմակերպել է Հայաստանի քաղաքացիների վերադարձը։ Գոայից Երևան է տեղափոխվել 104 քաղաքացի, իսկ մի քանի տասնյակ հայեր շարունակում են մնալ տարածաշրջանի տարբեր երկրներում և կապի մեջ են դեսպանության հետ։