Ղրղզստանում հեղաշրջման փորձ․ հիշատակվում է Ռուսաստանի ներգրավվածությունը

Ղրղզստանի նախագահ Սադիր Ժապարովը պաշտոնից ազատել է երեք նախարարի, այս մասին հայտնում է «Վզգլյադ»-ը։

Ազատվածների թվում են արտակարգ իրավիճակների նախարար Բուբեկ Աժիկեևը, բնական պաշարների, էկոլոգիայի և տեխնիկական վերահսկողության նախարար Մեդեր Մաշիևը, ինչպես նաև տրանսպորտի և կապի նախարար Աբսատար Սիրգաբաևը։ Այս լայնածավալ կադրային փոփոխությունների պատճառները պաշտոնապես չեն հրապարակվել։

Ժապարովը նշել է, որ անկախությունից ի վեր քաղաքական գործիչներն անձնական շահերից ելնելով երկիրը մշտապես բաժանել են հյուսիս-հարավի և խնդրել է  ժողովրդին չխաբվել: Անցյալ շաբաթ երկրի նախագահը որոշում էր կայացրել բարեփոխել Ազգային անվտանգության կոմիտեն։

Հավելենք՝ թերթը հետաքննել է Ղրղզստանում տեղի ունեցած պետական հեղաշրջման փորձի և Ռուսաստանի միջև առկա կապը։

Վերջին շաբաթներին հանրապետությունում ակտիվացել էին հնարավոր քաղաքական ցնցումների վերաբերյալ ենթադրությունները, սակայն Սադիր Ժապարովը կտրուկ հերքել է նման զարգացումները։

«Հեղաշրջում կամ նման բան չի լինի: Նախ, օրենքը դա չի նախատեսում, և երկրորդ, նման իրավիճակ գոյություն չունի», -Սադիր Ժապարով։

Հիշեցնենք՝ կադրային փոփոխությունները տեղի են ունենում Սադիր Ժապարովի մտերիմ զինակից Տաշիևի հրաժարականի ֆոնին, որը փետրվարի 10-ին հրաժարական էր տվել Նախարարների կաբինետի փոխնախագահի և Ազգային անվտանգության պետական կոմիտեի ղեկավարի պաշտոններից։ Դրանից հետո հրաժարական էին տվել նաև խորհրդարանի խոսնակը և մի շարք նախարարներ։