4400 ձերբակալություն. ԱՄՆ-ում ներգաղթյալների կալանքի գործելաոճը չի փոխվում

ԱՄՆ դատարանները ավելի քան 4400 անգամ ԱՄՆ ներգաղթի և մաքսային ծառայության՝ ICE-ի կողմից ձերբակալությունները, ճանաչել են անօրինական, սակայն այդ գործելաոճը շարունակվում է: 

Ինչպես հայտնում է Reuters-ը՝ հղում անելով դատական տվյալների վերլուծությանը, հոկտեմբերից ի վեր ԱՄՆ դաշնային դատավորները ամբողջ երկրում կայացրել են առնվազն 4421 որոշում՝ անօրինական ճանաչելով ներգաղթյալների կալանավորումը ICE-ի կողմից: Չնայած դրան, նախագահ Դոնալդ Թրամփի վարչակազմը շարունակում է մարդկանց երկարատև կալանքի տակ պահելու գործելաոճը՝ զանգվածային արտաքսումների արշավի շրջանակներում:

Թրամփի պաշտոնավարման սկզբից ի վեր ձերբակալվածները ներկայացրել են ավելի քան 20 200 նման հայց՝ պահանջելով ազատ արձակել իրենց։ Առնվազն 4421 դեպքում՝ ավելի քան 400 դաշնային դատավորներ, վճռել են, որ ICE-ը մարդկանց ապօրինի է պահում։

Միգրացիոն քաղաքականության խստացման ֆոնին ICE-ի կենտրոններում ձերբակալվածների թիվը հասել է 68 հազարի, ինչը մոտ 75%-ով ավելի է, քան անցյալ տարի Թրամփի պաշտոնը ստանձնելու պահին էր:

Հունվարի վերջին հայտնի դարձավ, որ ICE-ը նախատեսում է նաև 23 արդյունաբերական պահեստ վերափոխել ներգաղթյալների պահման կենտրոնների, որտեղ կտեղակայվի մինչև 80 հազար մարդ։