Գարեգին Բ-ն հանդիպել է ԶՈՒ-ում ծառայությունը դադարեցրած քահանաներին

 Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսն ընդունել է գնդերեց քահանա հայրերին, որոնց ծառայությունը  ինչպես հայտնել էինք ավելի վաղ, ՀՀ զինված ուժերում դադարեցվել է փետրվարի 1-ից։ Այս մասին հայտնում են Մայր Աթոռից։

«Նորին Սրբությունն իր գնահատանքն ու հայրական օրհնությունն է բերել հոգևոր հայրերին՝ գոհունակությամբ անդրադառնալով նրանց նվիրյալ ծառայությանը՝ հայոց բանակում հոգևոր-բարոյական առողջ միջավայրի ձևավորման, զինվորականների հավատքի, հայրենիքի հանդեպ սիրո և մարտական ոգու զորացման գործում։

Նշվում է, որ հանդիպման ընթացքում Ամենայն Հայոց Կաթողիկոսը կատարել է նաև հոգևոր սպասավորների նոր նշանակումներ՝ հորդորելով քահանա հայրերին նույն նվիրումով և պատասխանատվությամբ շարունակել իրենց հոգեփրկչական առաքելությունը ծառայության նոր վայրերում»,- այս մասին հայտնում են Մայր Աթոռից։