Տուսկի որոշմամբ՝ կստեղծվի հանձնաժողով Էփշտեյնի գործով

Լեհաստանը դարձել է առաջին երկիրը, որտեղ ստեղծվել է կառավարական հանձնաժողով՝ կապված Ջեֆրի Էփշտեյնի գործի շուրջ հրապարակված նոր նյութերի հետ։ Համապատասխան որոշումը ստորագրել է երկրի վարչապետ Դոնալդ Տուսկը։

Հանձնաժողովի ստեղծումը հետևել է ԱՄՆ-ում հրապարակված փաստաթղթերին, որոնք վերաբերում են սկանդալային միլիարդատիրոջ գործունեությանը և նրա շրջապատին։ Լեհական կողմը նպատակ ունի ուսումնասիրել՝ արդյոք ամերիկյան դատարանների և լրատվամիջոցների նյութերում հիշատակվող դրվագներում առկա են լեհ քաղաքացիների հնարավոր շփումներ կամ ներգրավվածություն։

Առանձնահատուկ ուշադրություն է դարձվելու մոդելային բիզնեսին առնչվող տեղեկություններին։ ԱՄՆ արդարադատության նախարարության հրապարակումներում նշվում է, որ Արևելյան Եվրոպայում գործող որոշ մոդելային գործակալությունների միջոցով, այդ թվում՝ Լեհաստանում, հնարավոր է եղել երիտասարդ աղջիկների ներգրավում արտասահմանյան ուղևորությունների համար։

Միևնույն ժամանակ, ներկայումս հրապարակված նյութերում չեն հայտնաբերվել լեհ քաղաքական գործիչների կամ խոշոր գործարարների կոնկրետ անուններ։ Հանձնաժողովի աշխատանքների ընթացքում նախատեսվում է գնահատել հասանելի տվյալների հավաստիությունը և անհրաժեշտության դեպքում ներկայացնել լրացուցիչ եզրակացություններ։