Թուրքիան և Եգիպտոսը ստորագրել են ութ համագործակցության համաձայնագիր
Կահիրեում կայացել է Թուրքիայի նախագահ Ռեջեփ Թայիփ Էրդողանի և Եգիպտոսի նախագահ Աբդել Ֆաթթահ աս-Սիսիի հանդիպումը, որի ընթացքում կողմերը քննարկել են երկկողմ համագործակցության ընդլայնման հնարավորությունները։
Բանակցությունների ընթացքում ուշադրություն է դարձվել տնտեսության, առևտրի, պաշտպանության, տրանսպորտի և էներգետիկայի ոլորտներում համագործակցության խորացմանը։ Կողմերը նպատակ են դրել առաջիկա շրջանում երկկողմ ապրանքաշրջանառության ծավալը հասցնել մինչև 15 միլիարդ ԱՄՆ դոլար։
Հանդիպման արդյունքներով Թուրքիան և Եգիպտոսը ստորագրել են ութ փաստաթուղթ։ Դրանց թվում է ռազմական համագործակցության շրջանակային համաձայնագիր երկու երկրների կառավարությունների միջև, ինչպես նաև փոխըմբռնման հուշագիր՝ առևտրի և ներդրումների նախարարությունների միջև։
Կողմերը ընդգծել են, որ ստորագրված փաստաթղթերը կարևոր քայլ են թուրք-եգիպտական հարաբերությունների զարգացման և տարածաշրջանային համագործակցության ամրապնդման ուղղությամբ։
