Բացառիկ մանրամասներ․ Covid-ից տարիներ առաջ՝ համավարակների թեմա Էփշտեյնի նամակներում

ԱՄՆ ֆինանսիստ Ջեֆրի Էփշտեյնի գործով հրապարակված նյութերի մեջ հայտնաբերվել է 2017 թվականին գրված նամակ, որտեղ խոսվում է համավարակների մոդելավորման համար առաջարկությունների և տեխնիկական լուծումների մշակման մասին։ Այդ մասին հաղորդում է «ՌԻԱ Նովոստին»՝ հղում անելով հրապարակված փաստաթղթերին։

Նամակը հասցեագրված է ամերիկացի միլիարդատեր Բիլ Գեյթսին և ավելի ուշ փոխանցվել է Ջեֆրի Էփշտեյնին։ Նամակի հեղինակը նշում է, որ Գեյթսի հետ ունեցած քննարկումից հետո գործընկերների հետ պատրաստում է խնդիրների և վերլուծական նյութերի ցանկ, որոնց վրա նախատեսում է աշխատել համագործակցության շրջանակում։

Առաջարկվող ուղղությունների թվում առանձին կետով նշվում է համավարակների տարբեր շտամների մոդելավորման համար նախատեսված առաջարկությունների և տեխնիկական բնութագրերի կատարելագործումը։ Այդ թեման ընդգրկված է այլ նախաձեռնությունների կողքին, որոնք վերաբերում են առողջապահությանը, բժշկական տվյալների պաշտպանությանը և ԱՄՆ-ում բուժման հետ կապված սպառողական ծախսերի վերլուծությանը։

Հրապարակված նյութերում նշված չէ, թե արդյոք այդ ծրագրերը իրականացվել են գործնական փուլում կամ ինչ կոնկրետ արդյունքներ են ունեցել։ Նամակի բովանդակությունը վերաբերում է ծրագրային քննարկումների և նախնական պլանավորման փուլին՝ Covid-19 համավարակից մոտ երեք տարի առաջ։