Կիևը զիջումների չի գնա․ Զելենսկի

Ուկրաինայի նախագահ Վլադիմիր Զելենսկին հայտարարել է, որ Աբու Դաբիում նախատեսվող բանակցությունների ընթացքում Ուկրաինան կձգտի երկխոսության, սակայն չի պատրաստվում զիջումների։

ՌԲԿ-Ուկրաինայի փոխանցմամբ՝ Զելենսկին այս մասին ասել է ՆԱՏՕ-ի գլխավոր քարտուղար Մարկ Ռյուտեի հետ մամուլի ասուլիսի ժամանակ։

Զելենսկու խոսքով՝ ռուսական պատվիրակության ներկայացրած առաջարկներն ու ազդակները կդառնան քննարկման առարկա բոլոր ներգրավված կողմերի համար։ Նա նշել է, որ Ուկրաինայի պատվիրակության հետ նախապես պայմանավորվել են՝ մանրամասն ուսումնասիրել, թե ինչ են բերում ռուս բանակցողները և ինչ հնարավոր փոխզիջումների են պատրաստ գնալ։

Նախագահը ընդգծել է, որ ուկրաինական կողմը բաց է երկխոսության համար, սակայն չի դիտարկում որևէ միակողմանի զիջում։ Նրա խոսքով՝ բանակցային գործընթացում անհրաժեշտ է փնտրել շփման ուղիներ, բայց առանց Ուկրաինայի դիրքորոշումներից հրաժարվելու։

Զելենսկին նաև հայտնել է, որ Կիևը պատրաստ է աջակցել Միացյալ Նահանգների կողմից առաջարկվող քայլերին, որոնք ուղղված են լարվածության նվազեցմանը և իրավիճակի ապաէսկալացիային։