Գարեգին Բ-ի դեմ նոր քրեական վարույթ են նախապատրաստում․ «Հրապարակ»

Իշխանությունները Գարեգին Բ-ի դեմ նոր քրեական վարույթ են նախապատրաստում։ Մեզ պատմեցին, որ Քննչական կոմիտեում մեղադրանք է քննվում` «փողերի լվացման» հոդվածով։ Այս մասին գրում է «Հրապարակ» օրաթերթը։ 


 «Այդ վարույթի շրջանակներում հարցաքննվել է «Շողակաթ» հեռուստաընկերության տնօրեն Մանյա Ղազարյանը, որը ևս գործով անցնում է։ 



 «Այո, ես հրավիրվել եմ Քննչական կոմիտե՝ վկայի կարգավիճակում: Չեմ կարող մանրամասնություններ ներկայացնել հարցաքննության վերաբերյալ, քանի որ տեղյակ չեմ՝ դրա իրավունքն ունե՞մ, թե՝ ոչ։ Միայն կարող եմ ասել, որ քրեական գործը «Շողակաթի» հետ որևէ կապ չունի, բացահայտ անհիմն քրեական գործ է, և որեւէ լուրջ բան չեմ տեսնում»,- թերթին ասել է Մանյա Ղազարյանը։ 



Գործը վերաբերում է բնակարանին, որը Մայր Աթոռը հատկացրել է «Շողակաթի» երկարամյա տնօրենին` իր ֆոնդից: Հետագայում այդ բնակարանը սեփականատերը վաճառել է։ Այդ գործարքն էլ Քննչական կոմիտեն որակում է որպես փողերի լվացում, որն իրականացրել է Ամենայն հայոց կաթողիկոսը»,- գրել է թերթը։ 


Auroranews-ին տեղեկության վերաբերյալ քննչական կոմիտեից չմեկնաբանեցին։