Գրենլանդիայի վերաբերյալ մաքսատուրքերի մասին հայտարարությունը շանտաժ է․ Շվեդիայի վարչապետ

Շվեդիայի վարչապետ Ուլֆ Քրիստերսոնը ԱՄՆ նախագահ Դոնալդ Թրամփի կողմից Գրենլանդիայի վերաբերյալ մաքսատուրքերի մասին հայտարարությունը որակել է շանտաժ և աջակցություն հայտնել է թագավորությանը և դրա ինքնավար տարածքին։

Շաբաթ օրը Թրամփը հայտարարել է, որ փետրվարին Դանիայի, Նորվեգիայի, Շվեդիայի, Ֆրանսիայի, Գերմանիայի, Մեծ Բրիտանիայի, Նիդեռլանդների և Ֆինլանդիայի նկատմամբ կսահմանվի 10% մաքսատուրք, որը հետագայում կբարձրանա մինչև 25% և ուժի մեջ կմնա մինչև ԱՄՆ-ի կողմից Գրենլանդիան գնելու գործարք կնքելը։

«Մենք թույլ չենք տա, որ մեզ շանտաժի ենթարկեն։ Դանիայի և Գրենլանդիայի վերաբերյալ որոշումներ կայացնեն միայն Դանիան և Գրենլանդիան», - գրել է Քրիստերսոնը X սոցիալական ցանցում։

Նա հավելել է, որ Շվեդիան ներկայումս բանակցություններ է վարում ԵՄ այլ երկրների, Նորվեգիայի և Մեծ Բրիտանիայի հետ համատեղ պատասխանի շուրջ։