20:00 Լուրերը մեկ տողով. Ծառուկյանը կալանավորվեց, Թրամփի պահանջները, ՌԴ-ում նավթային ճգնաժամը կսրվի

Անցած ժամվա լուրերը՝ հակիրճ և բովանդակային.

·  Գագիկ Ծառուկյանը կալանավորվել է երկու ամսով. դատարանը բավարարել է իրավապահների միջնորդությունը՝ առանձնապես խոշոր չափերով խարդախության և փողերի լվացման մեղադրանքով:

·  Փաստաբանական կողմը կալանավորման որոշումը համարում է քաղաքական հանձնարարական. Երեմ Սարգսյանը հայտարարել է, որ դատական նիստն ընթացել է ձևական, դատավորին ոչ մի հանգամանք չի հետաքրքրել, և իրենք պատրաստվում են բողոքարկել որոշումը:

·  Քննչական կոմիտեն հրապարակել է ԱԱԾ-ի գործողությունների տեսանյութը. կադրերում պատկերված է իրավապահ մարմինների մուտքը Գագիկ Ծառուկյանի առանձնատուն:

·  Կենդանաբանական այգում առյուծի անկման փաստով քննություն է սկսվել. Քննչական կոմիտեն պարզում է Գագիկ Ծառուկյանի ընդունելությունների տանից տեղափոխման նպատակով քնեցված էգ առյուծի մահվան հանգամանքները:

·  Դոնալդ Թրամփը պահանջում է Գրենլանդիան հանձնել ԱՄՆ վերահսկողությանը. ԱՄՆ նախագահը հայտարարել է, որ կղզին ունի կարևոր ռազմավարական նշանակություն, իսկ Դանիան գրեթե ոչինչ չի ծախսում դրա համար՝ թույլ տալով Ռուսաստանի և Չինաստանի ակտիվացումը տարածաշրջանում:

·  ԱՄՆ-ը կչեղարկի Թուրքիայի դեմ պատժամիջոցները և կոչ կանի դադարեցնել «սպանդը» Ուկրաինայում. Թրամփը բարձր է գնահատել Թուրքիայի լոյալությունը, իսկ ուկրաինական ռազմաճակատի պատկերներն անվանել է անտանելի սպանդ, որը պետք է շուտափույթ դադարեցվի:

·  Ֆրանսիան Սիրիային կվերադարձնի բռնագրավված 50 միլիոն եվրոն. Էմանուել Մակրոնը հայտարարել է, որ նախկին բռնապետի ընտանիքից ապօրինի ձեռք բերված և բռնագրավված միջոցները կուղղվեն սիրիացի ժողովրդի զարգացման ծրագրերին:

·  Ուկրաինական ԱԹՍ-ների հարվածից հետո կանգնել է Ռուսաստանի խոշորագույն նավթավերամշակման գործարանը. Օմսկի գործարանի աշխատանքի լիակատար դադարեցումը կարող է էականորեն խորացնել վառելիքային ճգնաժամը Ռուսաստանում:

·  ԱՄՆ-ը Իսրայելից դուրս է բերել իր օդային լիցքավորող ինքնաթիռների կեսը. արբանյակային լուսանկարները հաստատում են, որ «Բեն Գուրիոն» օդանավակայանում տեղակայված շուրջ 60-72 օդանավերից ներկայումս մնացել է միայն 32-ը:

·  ՄՕԿ-ը վերականգնել է Ռուսաստանի օլիմպիական կոմիտեի իրավունքները. չեղարկվել է նաև ռուս մարզիկներին միայն չեզոք կարգավիճակով հանդես գալու և թիմային մրցումներին մասնակցելու արգելքը:

·  Պարագվայցի սենատորը խիստ վիրավորանքներով դատապարտել է Կիլիան Մբապեին. Սելեստե Ամարիլյան Ֆրանսիայի հավաքականի հարձակվողին անվանել է «ամբարտավան ու տգեղ»՝ խաղից հետո Պարագվայի դարպասապահի ձեռքը չսեղմելու համար:

·  Ֆուտբոլի Աշխարհի առաջնությունում մեկնարկում են 1/8 եզրափակչի հերթական հանդիպումները. Ատլանտայում ուղիղ եթերում սկսվում է Արգենտինա-Եգիպտոս խաղը, իսկ կեսգիշերին կմրցեն Շվեյցարիայի և Կոլումբիայի հավաքականները:

·  Հուլիսի 8-ին Հայաստանում սպասվում է հորդառատ անձրև, ամպրոպ և կարկուտ. օդի ջերմաստիճանը ցերեկը կնվազի 2-4 աստիճանով, սակայն հաջորդող օրերին կգրանցվի ջերմաստիճանի կտրուկ բարձրացում: