Միջազգային օլիմպիական կոմիտեն չեղարկել է ռուս մարզիկների նկատմամբ սահմանված պատժամիջոցները

Միջազգային օլիմպիական կոմիտեն (ՄՕԿ) չեղյալ է հայտարարել ռուս մարզիկների համար սահմանափակումների վերաբերյալ իր առաջարկությունները, հայտնում է ՄՕԿ-ի կայքը։

ՄՕԿ-ի գործադիր խորհրդի ընդունած որոշմամբ՝ ռուս մարզիկների և թիմերի մասնակցության համար 2022 թվականի փետրվարի 28-ից մինչև 2023 թվականի մարտի 28-ը գործող առաջարկվող պայմաններն այլևս ուժի մեջ չեն։

2022 թվականի փետրվարին միջազգային ֆեդերացիաներին և մրցումների կազմակերպիչներին առաջարկվել էր միջազգային մրցաշարերի չթույլատրել ռուս և բելառուս մարզիկների, ինչպես նաև պաշտոնյաների մասնակցությունը։

2023 թվականի մարտին ՄՕԿ-ը առաջարկել էր յուրաքանչյուր մարզիկի դիտարկել առանձին, նրանց թույլատրել մասնակցել միայն չեզոք կարգավիճակով և բացառել թիմային մրցումներից։ Բացի այդ, Զինված ուժերի և այլ անվտանգության մարմինների հետ առնչություն ունեցող ռուս մարզիկների մասնակցությունն արգելված էր։

Երկու առաջարկությունների չեղարկումից հետո ՄՕԿ-ը թույլատրել է նրանց մասնակցել միջազգային մրցաշարերին՝ առանց յուրաքանչյուր մարզիկի չեզոքությունը առանձին գնահատելու։

2028 թվականի Օլիմպիական խաղերի որակավորման մրցումների ժամկետները հաշվի առնելով՝ միջազգային ֆեդերացիաները պատասխանատու են դոպինգ-թեստավորման ժամանակին կազմակերպման համար։ Նրանք պետք է ընդհանուր ծրագիրը համակարգեն ITA-ի հետ։ Եթե այդ ժամանակահատվածում RUSADA-ն դեռևս չհամապատասխանի WADA-ի չափանիշներին, ՄՕԿ-ը ITA-ին կհանձնարարի նույն սկզբունքով ապահովել բոլոր որակավորված մարզիկների անկախ թեստավորումը։

2025 թվականի դեկտեմբերին ՄՕԿ-ը մեղմացրել էր իր դիրքորոշումը՝ առաջարկելով, որ ֆեդերացիաները ռուս և բելառուս մարզիկներին թույլ տան ազգային խորհրդանիշներով մասնակցել պատանեկան մրցումներին։ 2026 թվականի մայիսին ՄՕԿ-ի գործադիր խորհուրդը նաև չեղյալ էր հայտարարել բելառուսների նկատմամբ սահմանափակումների վերաբերյալ իր առաջարկությունները, այդ թվում՝ թիմային մարզաձևերին մասնակցության և երկրում միջազգային մրցումներ անցկացնելու մասով։