Փաշինյանն ու ՀՀ-ում ԱՄՆ դեսպանը քննարկել են TRIPP նախագծի իրականացումը

Վարչապետ Նիկոլ Փաշինյանն ընդունել է Հայաստանում ԱՄՆ արտակարգ և լիազոր դեսպան Քրիստինա Քվինին, ով ավարտում է դիվանագիտական առաքելությունը Հայաստանի Հանրապետությունում։

Վարչապետը շնորհակալություն է հայտնել դեսպանին համագործակցության և Հայաստան–ԱՄՆ հարաբերությունների հետևողական զարգացմանը նպաստելու համար։ Նիկոլ Փաշինյանը հատկապես ընդգծել է, որ տիկին Քվինի պաշտոնավարման ընթացքում երկու երկրների հարաբերությունները բարձրացվել են ռազմավարական մակարդակի։

Քրիստինա Քվինը շնորհակալություն է հայտնել վարչապետին և ՀՀ Կառավարությանը համատեղ աշխատանքի և արդյունավետ փոխգործակցության համար։ Նա վստահություն է հայտնել, որ առաջիկայում ևս Հայաստան–ԱՄՆ համագործակցությունը կշարունակի զարգանալ բոլոր ուղղություններով։

Հանդիպման ընթացքում կողմերը մտքեր են փոխանակել TRIPP նախագծի իրականացման, ինչպես նաև երկուստեք հետաքրքրություն ներկայացնող այլ հարցերի շուրջ։