Հնդկաստանը ակնկալում է ԵԱՏՄ-ի հետ արագ համաձայնագրի կնքում․ դեսպան

Հնդկաստանը սպասում է ԵԱՏՄ-ի հետ արագ ազատ առևտրի համաձայնագրի, ՌԻԱ Նովոստիին տված հարցազրույցում ասել է Ռուսաստանում Հնդկաստանի դեսպան Վինայ Կումարը։

«Բանակցությունները սկսվել են նոյեմբերին, և տեղի է ունեցել առաջին փուլը։ Ես կասեի, որ երկու կողմերում էլ լավ հասկացողություն կա այն մասին, թե ինչի ենք մենք ուզում հասնել։ Եվ երկու կողմերն էլ ունեն քաղաքական կամք այս նպատակին հասնելու համար։ Այսպիսով, մենք հույս ունենք արագ արդյունքի», - ասել է դեսպանը։

Նրա խոսքով՝ Հնդկաստանը վստահ է, որ ազատ առևտրի համաձայնագիրը կօգնի հաղթահարել երկկողմ առևտրի անհավասարակշռությունը՝ ավելացնելով հնդկական արտահանումը։

«Եվրասիական տնտեսական հանձնաժողովի հետ բանակցությունները կարագացվեն, որպեսզի մենք կարողանանք հնարավորինս շուտ օգտվել ազատ առևտրի ռեժիմից։ Սա նաև կլինի առևտրային անհավասարակշռությունը վերացնելու ևս մեկ քայլ», - եզրափակել է դիվանագետը։