Վրաստանի և Թուրքիայի ներքին գործերի նախարարները քննարկել են Թուրքիայի ռազմաօդային ուժերի բեռնատար ինքնաթիռի վթարի հարցը

Վրաստանի ներքին գործերի նախարար Գեկա Գելաձեն և նրա պատվիրակությունը պաշտոնական այցով Ստամբուլում են։

Ներքին գործերի նախարարությունը հայտնել է, որ այցի ընթացքում նախարարը երկկողմ հանդիպում է ունեցել իր թուրք գործընկեր Ալի Երլիքայայի հետ։

«Կողմերը քննարկել են երկու երկրի միջև իրավապահ ոլորտի գործընկերությունը, դրա խորացման հեռանկարները և համագործակցության առաջնահերթ ոլորտները։

Ալի Երլիքայան կրկին շնորհակալություն է հայտնել իր վրացի գործընկերոջը՝ Վրաստանում Թուրքիայի ռազմաօդային ուժերի բեռնատար ինքնաթիռի վթարի ժամանակ ձեռնարկած ջանքերի, ինչպես նաև արագ և արդյունավետ համագործակցության համար։

Հանդիպման ընթացքում նաև անդրադարձ է եղել երկու կողմի միջև փորձի և լավագույն պրակտիկայի փոխանակմանը, ինչպես նաև ոստիկանական կրթության ոլորտում համագործակցության խորացմանը։ Երկու երկրի նախարարները հույս են հայտնել, որ համատեղ ջանքերով Վրաստանի և Թուրքիայի իրավապահ մարմինների միջև գործընկերությունը ապագայում էլ ավելի կզարգանա։

Եզրափակելով՝ Գեկա Գելաձեն շնորհակալություն է հայտնել իր թուրք գործընկերոջը հրավերի, ջերմ ընդունելության և հյուրընկալության համար»,- ասվում է Վրաստանի ներքին գործերի նախարարության հայտարարության մեջ։