«Զինված ագրեսիայի» դեպքում Ադրբեջանն ու Թուրքիան կօգնեն միմյանց
Ադրբեջանի և Թուրքիայի պաշտպանական գերատեսչությունների միջև ռազմական անվտանգության փոխադարձ ամրապնդման մասին հուշագրի ստորագրման նպատակն է ուժեղացնել կողմերի համագործակցությունը պաշտպանության ոլորտում՝ ապահովելով իրենց պետությունների անվտանգությունն ու տարածքային ամբողջականությունը, ինչպես նաև պաշտպանելով ինքնիշխանությունն ու անկախությունը։ Այդ մասին հայտարարել է Միլլի Մեջլիսի պաշտպանության, անվտանգության և կոռուպցիայի դեմ պայքարի հանձնաժողովի նախագահ Արզու Նագիևը։
Նրա խոսքով՝ փաստաթուղթը ծառայում է Ադրբեջանի և Թուրքիայի միջև ռազմավարական գործընկերությանը։
«Հուշագրի նպատակն է ամրապնդել փոխադարձ համակարգումը ռազմական անվտանգության ոլորտում, զարգացնել համատեղ վարժանքները, ռազմական կրթությունը և համագործակցությունը պաշտպանական արդյունաբերության ոլորտում: Փաստաթուղթը բաղկացած է ութ կետից։
Համաձայնագրի՝ ստորագրող կողմերը պարտավորվում են միմյանց տրամադրել փոխադարձ օգնություն իրենցից մեկի դեմ զինված ագրեսիայի դեպքում՝ ՄԱԿ-ի կանոնադրության 51-րդ հոդվածով ճանաչված անհատական և կոլեկտիվ ինքնապաշտպանության իրավունքն իրականացնելու համար»,- ասվում է պատգամավորի խոսքում։
Նշվում է նաև, որ կողմերը միմյանց տրամադրում են ռազմական օգնություն իրենցից մեկի խնդրանքով և իրենց ազգային օրենսդրությամբ սահմանված ընթացակարգերին համապատասխան։
