Պուտինը հրապարակավ ստում է․ Զելենսկի

Ուկրաինայի նախագահ Վլադիմիր Զելենսկին հայտարարել է, որ Ռուսաստանի նախագահ Վլադիմիր Պուտինի հայտարարությունները Խարկովի մարզի Կուպյանսկ քաղաքի լիակատար գրավման վերաբերյալ չեն համապատասխանում իրականությանը։ Նրա խոսքով՝ քաղաքում իրավիճակը այլ է։

Զելենսկին նշել է, որ անձամբ այցելել է Կուպյանսկ՝ միջազգային հանրությանը ցույց տալու համար, որ ռուսական զորքերը չեն վերահսկում քաղաքը։ Նրա խոսքով՝ նման հայտարարությունները հրապարակային ապատեղեկատվություն են ու չեն արտացոլում ռազմաճակատում առկա իրադրությունը և Ռուսաստանի նախագահը հրապարակավ ստում է։

Հավելենք՝ ավելի վաղ Ուկրաինայի զինված ուժերը հայտնել էին, որ Կուպյանսկում շրջափակման մեջ է հայտնվել ռուսական զինվորների մի խումբ։ Ուկրաինական կողմի տվյալներով՝ շուրջ 200 ռուս զինծառայող հայտնվել է շրջափակման մեջ, իսկ նրանց ցամաքային մատակարարման ուղիները փակվել են։

Բացի այդ, Ուկրաինայի պաշտպանության ուժերը վերահսկողություն են հաստատել Կուպյանսկ քաղաքի հյուսիս-արևմտյան հատվածի նկատմամբ։ Ուկրաինական կողմը շարունակել է ընդգծել, որ քաղաքում ռազմական գործողությունները շարունակվում են, և իրավիճակը գտնվում է իրենց վերահսկողության տակ։