Թուրքիան մեկ տարով երկարաձգել է ռուսական գազի գնման պայմանագրերը
Թուրքիան մեկ տարով երկարաձգել է ռուսական գազի գործող պայմանագրերը, որոնց ընդհանուր ծավալը կազմում է 22 միլիարդ խորանարդ մետր և որոնց ժամկետը լրանում է 2025 թվականի վերջին։ Այս մասին հայտնել է Թուրքիայի էներգետիկայի նախարար Ալփարսլան Բայրաքթարը։
Անկարան, որը ռուսական գազի վերջին խոշոր ներկրողն է Եվրոպայում, զուգահեռաբար մի շարք երկարաժամկետ պայմանագրեր է կնքել հեղուկացված բնական գազի մատակարարման վերաբերյալ՝ հույսը դնելով առաջարկի ավելցուկի վրա, որն ակնկալվում է համաշխարհային շուկայում առաջիկա տարիներին։ Նոր մատակարարումների զգալի մասը կլինի ԱՄՆ-ից։ BOTAS պետական ընկերությունը պաշտոնապես երկարաձգել է Ռուսաստանի հետ պայմանագիրը, ասել է Ալփարսլան Բայրաքթարը։ ««Գազպրոմից» մատակարարումները կշարունակվեն հաջորդ տարի, բայց մենք կենտրոնանում ենք ավելի կարճաժամկետ հեռանկարի վրա՝ մոտ մեկ տարի», – հավելել է Բայրաքթարը։
Թուրքիան նաև բանակցություններ է վարում Իրանից 10 միլիարդ խորանարդ մետր գազի ներմուծման գործարքի շուրջ, որի ժամկետը լրանում է 2026 թվականի հուլիսին, ասել է էներգետիկայի նախարարը՝ հավելելով, որ քննարկվում է նաև Իրանի տարածքով մատակարարվող թուրքմենական գազի ծավալների ավելացման հարցը։
Բայրաքթարը նշել է, որ Թուրքիան նախատեսում է ներդրումներ կատարել ԱՄՆ-ում գազի արդյունահանման ոլորտում՝ 15 տարվա ընթացքում ԱՄՆ-ից մինչև 1500 բեռ հեղուկացված բնական գազ գնելու իր պարտավորությունը ստանձնելու համար։
«Մեր դիրքը ամրապնդելու և ամբողջական արժեքային շղթա ստեղծելու համար մենք դիտարկում ենք ԱՄՆ շուկայում արտադրական շղթայի վերին հատվածներում ներդրումներ կատարելու հնարավորությունը», - նշել է Բայրաքթարը։ Պետական TPAO-ն բանակցություններ է վարում ամերիկյան էներգետիկ հսկաների, այդ թվում՝ Chevron-ի և Exxon-ի հետ և համաձայնագիրը կարող է կնքվել արդեն հունվարին։
