Սամվել Շահրամանյանն անդրադարձել է Արցախի թեմի առաջնորդի՝ Փաշինյանի հետ հանդիպելուն
Սամվել Շահրամանյանը լրագրողների հետ զրույցում անդրադարձել է Արցախի թեմի առաջնորդ Վրթանես Սրբազանի ներկայությանը՝ Նիկոլ Փաշինյանի կազմակերպած եպիսկոպոսների հանդիպմանը՝ նշելով, որ չի ցանկանում շտապել մեկնաբանություններով։ Նրա խոսքով՝ ամենացավալին գործող իշխանության և եկեղեցու միջև ստեղծված հակադրությունն է, որը, իր կարծիքով, պետք չէր հանրայնացնել։ Շահրամանյանը ընդգծել է, որ նման հարցերը պետք է կարգավորվեին փակ դռների հետևում՝ առանց լայն հանրության ներգրավման։
Նա հավելել է, որ կսպասեն եկեղեցու որոշմանը, որից հետո կներկայացնեն իրենց դիրքորոշումը։ Շահրամանյանի խոսքով՝ հաջորդ օրը հանդիպել է Վրթանես Սրբազանի հետ և լսել նրա հիմնավորումները։
«Ինձ մեկ հարց էր հետաքրքրում՝ արդյոք այդ հանդիպումը համաձայնեցված էր Վեհափառի հետ, ստացել եմ բացասական պատասխան, ըստ դրա իմ եզրակացությունները ես արել եմ»,– նշել է նա։
