Փաշինյանը խոսել է հոսանքի գնի իջեցման վերանայման մասին

Վարչապետ Նիկոլ Փաշինյանը, աշխատանքային քննարկման ժամանակ Հայաստանի էլեկտրական ցանցերի ժամանակավոր կառավարիչ Ռոմանոս Պետրոսյանի հետ, նշել է, որ տարբեր երկրներում քաղաքական նպատակահարմարությունից և կոմպրոմիսներից ելնելով հաճախ արհեստականորեն նվազեցվել են գները՝ խուսափելու քաղաքական ճգնաժամերից։ Նրա խոսքով՝ այսպիսի մոտեցումը հանգեցրել է նրան, որ որոշ համակարգեր կանգնել են կոլապսի առաջ։

Փաշինյանը ընդգծել է, որ անհրաժեշտ է հստակ ներկայացնել գնային տրամաբանությունը քաղաքացիներին. «Գինը պետք է էֆեկտիվ լինի, որ համակարգի բնականոն գործունեությունը և որոշակի զարգացումն ապահովվի։ Դրանից ավելի գումարն էլ արդարացված չէ, քանի որ քաղաքացին տրամաբանական հարց կտա՝ ինչի՞ եմ այսքան վճարում»։

Ռոմանոս Պետրոսյանը նշել է, որ արդեն պատկերացում ունեն հոսանքի գնի հնարավոր վերանայման չափերի վերաբերյալ։ Նրա խոսքով՝ լիահույս է, որ տարեսկզբին կկայացվի համապատասխան որոշումը։