Փաստաբան Ալեքսանդր Կոչուբաևի կնոջ վիճակը կայունացել է

Փաստաբան Ալեքսանդր Կոչուբաևի կնոջ վիճակը կայունացել է: Լրատվամիջոցների հետ զրույցում այդ մասին հայտնեց նրա գործընկեր Էրիկ Ալեքսանյանը։

Նշենք, որ Կոչուբաևի կնոջ վիճակը վատացել է ծննդաբերությունից հետո։ Ալեքսանյանը բաց նամակով դիմել էր ՀՀ գլխավոր դատախազին՝ խնդրելով վերացնել փաստաբան Կոչուբաևի նկատմամբ ընտրված խափանման միջոց կալանքը։ Հոկտեմբերի 28-ին կալանքը փոխարինվեց բացակայելու արգելքով։

«Կոչուբաևի կինը համեմատաբար լավ է զգում իրեն»,– ասել է Ալեքսանյանը։

Ինչ վերաբերում է փաստաբանի դեմ հարուցված գործին, ապա այն դատական վարույթում է։

«Սպասում ենք դատական առաջին նիստին, օրը դեռ նշանակված չէ»,- մանրամասնել է Ալեքսանյանը:

Հիշեցնենք` իրավապահները փաստաբան Ալեքսանդր Կոչուբաևին բերման ենթարկեցին հոկտեմբերի 16-ին Շենգավիթի դատարանից։ Ըստ տեղեկությունների` պատճառը նրա ֆեյսբուքյան կոշտ գրառումն է Մկրտիչ սրբազանի լուսանկարով։

Քննչական կոմիտեն ավելի ուշ հայտնեց, որ Կոչուբաևին մեղադրանք է առաջադրվել Քրեական օրենսգրքի 490-րդ հոդվածի 2-րդ մասով (դատավորի, դատախազի, քննիչի մասին արատավորող, նշված անձանց իրավունքներին ու օրինական շահերին այլ վնաս պատճառող տեղեկություն հրապարակելը՝ կապված նշված անձանց օրինական ծառայողական կամ մասնագիտական գործունեության հետ): Հոկտեմբերի 17-ին հայտնի դարձավ, որ նա 2 ամսով կալանավորվել է։