Ծառուկյանն ասել է՝ ուզում է հանդիպում՝ կհանդիպենք. Նաիրա Զոհրաբյան
168 TV-ի «Ռեվյու» հաղորդաշարի եթերում պատասխանելով հարցին՝ արդյոք վերանայումների կարիք կա՞ «Բարգավաճ Հայաստան» կուսակցության օրակարգում, ե՞րբ է կայանալու Փաշինյան-Ծառուկյան հանդիպումը, ԱԺ ԲՀԿ պատգամավոր Նաիրա Զոհրաբյանը պատասխանել է․ «Ծառուկյանն ասել է՝ ուզում է հանդիպում՝ կհանդիպենք, բայց պետք է այդ հանդիպումն ունենա օրակարգ։ Թե ի՞նչ պայմանով է Ծառուկյանը հանդիպելու, չեմ կարող ասել, բայց ԲՀԿ-ի օրակարգը մնում է անփոփոխ՝ Նիկոլ Փաշինյանը պետք է հեռանա, և հանդիպումը լինելու է այդ օրակարգի շրջանակում»։
Զոհրաբյանը նշել է, որ իրենք մասնակցելու են ընտրություններին՝ լինի արտահերթ թե հերթական․ «Որովհետև չեմ կարծում, որ կարելի է դաշտը թողնել Նիկոլին ու Նիկոլի գրպանում գտնվող կուսակցություններին, որովհետև դա նշանակում է, որ ինչ-որ տեղ դավաճանում ես քո ընտրողներին»:
