Ապագան այլևս վաղը չէ․ Փաշինյան

ՀՀ վարչապետ Նիկոլ Փաշինյանը Ազգային ժողովում, «2026 թվականի պետական բյուջեի մասին» օրենքի նախագծի քննարկման ընթացքում, անդրադարձել է ապագայի ընկալմանը՝ նշելով, որ այն այլևս հեռավոր երևույթ չէ։

«2021 թվականին մենք ընտրություններին մասնակցեցինք «Ապագա կա» կարգախոսով, և հիմա ապրում ենք հենց այդ ապագայի մեջ։ Ապագան վաղը չէ, ապագան հիմա է։ Մենք պետք է փոխենք մեր ընկալումը և գիտակցենք, որ ապագան մեր այսօրվա ամենօրյա կյանքն է»,– ընդգծել է վարչապետը։

Փաշինյանի խոսքով՝ կառավարության գաղափարական հիմքում դրված է պետականության և պետական շահերի առաջնայնությունը։ Նա նշեց, որ պետությունը պետք է ծառայի իր քաղաքացիներին՝ ապահովելով նրանց անվտանգությունն ու բարեկեցությունը։

«Մեր իրականության մեջ միշտ եղել է հարց՝ ինչի՞ համար է պետությունը։ Մենք եկել ենք այն համոզման, որ Հայաստանի Հանրապետությունը ինքնաբավ պետություն է իր միջազգային ճանաչված սահմանների ներսում, և նրա հիմնական առաքելությունը սեփական քաղաքացիների երջանկությունն ու բարեկեցությունն ապահովելն է»,- ասել է վարչապետը։

Նա հավելել է, որ կառավարության բոլոր ռազմավարությունները՝ ներառյալ պաշտպանական և անվտանգային քաղաքականությունները, կառուցվում են հենց այս գաղափարական հիմքի վրա։