Մարդիկ օդանավակայանում քաշքշուկի մեջ չեն ընկնի` ՊԵԿ-ի և ԱԱԾ- համատեղ նախագիծը
ՀՀ պետական եկամուտների կոմիտեն ու ազգային անվտանգության ծառայությունը համատեղ նախագիծ են մշակում, որը կնվազեցնի օդանավակայանում անհարկի քաշքշուկի մեջ ընկնելու ռիսկը։ Այսօր հրավիրված ասուլիսի ժամանակ այս մասին հայտնեց ՀՀ պետական եկամուտների կոմիտեի նախագահ Էդուարդ Հակոբյանը։
«ԱԱԾ–ի հետ կարևոր բարեփոխման վրա ենք աշխատում, որը հնարավորություն կտա տարբեր օդանավակայաններից նախնական տեղեկատվություն ունենալ ուղևորների մասին։ Այսինքն` մինչև ուղևորի գալը ՀՀ մենք տեղեկատվություն կունենանք նրա շարժի մասին, դրա միջոցով կկարողանանք վերլուծել, հասկանալ` որոնք են ռիսկերը, և միայն ամենառիսկայիններին կանցկացնենք կարմիր ուղով, այլ ոչ թե բոլոր մարդկանց»,– ասաց Հակոբյանը։
Նա անդրադարձավ նաև ռիսկերի կարգավորման համակարգին, որով առանձնացնում են տարբեր ժամանակներում տարբեր խախտումներ թույլ տված ուղևորներին։
«Մենք գույքագրել ենք բոլոր մարդկանց և ռիսկի պրոֆիլներ ենք սահմանել։ Մեր համակարգում առանձնացրել ենք այն մարդկանց, որոնք փորձել են անօրինական տեխնիկա բերել»,– ասաց նա։
ՊԵԿ նախագահը նշեց` ռիսկերի այս համակարգն արդեն ներդրված է, թիրախավորված աշխատում են։
