Ավինյանը՝ Սարի Թաղի ջրահեռացման խնդիրները լուծելու ներդրումային ծրագրի մասին

Սարի Թաղի ժողովրդի հետ հանդիպման ժամանակ ասել եմ, որ, միանշանակ, այդտեղ հնարավոր է իրականացնել ներդրումային ծրագիր: Խոսքը 30 մլն դոլարանոց խնդրի մասին է: Իրականում ես իմ յուրաքանչյուր ասածի, խոստումների մասով շատ զգուշավոր եմ: Այդ մասին Երևանի ավագանու՝ հոկտեմբերի 23-ի նիստին հայտարարեց քաղաքապետ Տիգրան Ավինյանը՝ պատասխանելով Երևանի ավագանու «Մայր Հայաստան» խմբակցության անդամ Արշակ Սարգսյանի դիտարկմանը, թե քարոզարշավին Ավինյանը Սարի Թաղում բնակիչներին խստացել է ջրահեռացման հարցերը լուծել, բայց այդ հարցն իրականում Կառավարության տիրույթում է:

Ավագանու ընդդիմադիր անդամը հետաքրքրվեց՝ ինչո՞ւ էր Ավինյանը քարոզարշավի ժամանակ խոստանում Կառավարության գործառույթ կատարել:

Ավինյանն արձագանքեց՝ չի տվել ո՛չ քաղաքապետարանի, ո՛չ Կառավարության անունը, խնդրի լուծման իր մոտեցումն է ներկայացրել:

«Միակ ճանապարհը, որը ես տեսել եմ այն ժամանակ, և հիմա էլ միակ ճանապարհն է, որ տեսնում եմ, ներդրումային ծրագրով խնդրին լուծում տալն է: Ես ո՛չ քաղաքապետարանի անունն եմ ասել, ո՛չ Կառավարության անունն եմ ասել, այսինքն՝ այստեղ պետք է թաղամասային տրամաբանությամբ նոր ծրագիր իրականացվի, որը կստեղծի ներդրումների հնարավորություն:

Իսկ մանր-մունր ջրահեռացման հարցեր Սարի Թաղում այն ժամանակ էլ ենք լուծել, հիմա էլ ենք շարունակաբար լուծում»,- ասաց Ավինյանը: