Աշխարհը մտել է բարձր անորոշության շրջան. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ եվրատլանտյան անվտանգությունը գտնվում է բեկումնային փուլում, իսկ ՆԱՏՕ-ի արևելյան և հարավարևելյան սահմանների ճգնաժամերն ու հակամարտությունները ստիպում են վերանայել անվտանգության ապահովման ներկա մոտեցումները:

ՆԱՏՕ-ի անդամ պետությունների խորհրդարանների նախագահների պատվին կազմակերպված ճաշկերույթի ընթացքում Թուրքիայի նախագահն իր ելույթում նշել է. «Եվրատլանտյան անվտանգությունը պատմական բեկումնային պահ է ապրում: Մեր դաշինքի արևելյան և հարավարևելյան սահմաններին տեղի ունեցող պատերազմները, ճգնաժամերը, ահաբեկչությունը և անօրինական միգրացիան պահանջում են վերաիմաստավորել անվտանգության մասին մեր պատկերացումները»:

Ըստ Թուրքիայի առաջնորդի՝ նախկինում գործող մոդելներն ու արմատացած ընկալումները հետզհետե կորցնում են արդիականությունը, սակայն դեռ հստակ չէ, թե հատկապես ինչ մեխանիզմներ են գալու դրանց փոխարինելու։

Էրդողանը շեշտել է, որ աշխարհում սկսվել է բարձր անորոշության ժամանակաշրջան, որտեղ արձանագրվում է լարվածության աճ, կայունությունը փոխարինվում է հակամարտություններով, իսկ միջազգային դրությունը դառնում է առավել անկանխատեսելի։

Թուրքիայի նախագահը նաև հավելել է, որ ընթացող փոփոխությունների պատճառով անհրաժեշտություն է առաջանում մշակել տարածաշրջանային և միջազգային անվտանգության ապահովման նոր մոտեցումներ։