ՍԱՏՄ-ն փակել է «Արարատյան» կաթնամթերքի արտադրամասը՝ լուրջ խախտումների պատճառով

Սննդամթերքի անվտանգության տեսչական մարմնի կողմից «Խաք» ՍՊ ընկերությանը պատկանող կաթնամթերքի արտադրամասում իրականացված ստուգման արդյունքում արձանագրվել են սանիտարահիգիենիկ սահմանված պահանջների խախտումներ:

Ստուգումներն անցկացվել են Արարատի մարզի Քաղցրաշեն գյուղում գտնվող և «Արարատյան» ապրանքանիշով թողարկվող կաթնամթերքի արտադրամասում։ Տեսչական ստուգմամբ մասնավորապես պարզվել է, որ արտադրական շինության նախագծումն ու կառուցվածքը չեն ապահովել սննդամթերքի, պարենային հումքի ու փաթեթավորման նյութերի պահպանման անհրաժեշտ պայմանները։ Բացի այդ, հատակների մակերևույթները, առաստաղներն ու պատերը չեն ունեցել հարթ մակերես և չեն պահվել նորոգված վիճակում։ Արտադրական շինության դռները նույնպես հարթ չեն եղել և պատրաստված չեն եղել չներծծող նյութերից։ Արձանագրվել է նաև, որ թափոնները չեն տեղադրվել բացառապես դրանց և աղբի հավաքման ու պահպանման համար նախատեսված փակվող տարողություններում։

ՍԱՏՄ-ի փոխանցմամբ՝ տեսչական մարմնի ղեկավարի որոշմամբ՝ կաթնամթերքի արտադրամասի արտադրական գործունեությունը կասեցվել է մինչև հայտնաբերված խախտումները վերացնելը: