ՔՊ-ում այսօր կորոշեն ԱԺ փոխնախագահների թեկնածուներին

Այսօր երեկոյան հստակություն կմտնի Ազգային ժողովի փոխնախագահների պաշտոնների համար ընթացող պայքարում: Այս մասին գրում է «Ազատությունը»:

«Քաղաքացիական պայմանագիր» կուսակցության վարչությունն այսօր կայանալիք նիստի ընթացքում փակ, գաղտնի քվեարկության միջոցով ընտրություն կկատարի: Խորհրդարանի երկու փոխխոսնակների թափուր տեղերի համար մրցում են Հայկ Կոնջորյանը, ՔՊ փոխնախագահ Վահագն Ալեքսանյանը, պետաիրավական և Եվրոպական ինտեգրման հարցերի մշտական հանձնաժողովների ղեկավարներ Արուսյակ Ջուլհակյանն ու Արման Եղոյանը, ինչպես նաև պատգամավոր Ալխաս Ղազարյանը:

Նախորդ շաբաթ խորհրդարանի ղեկավարի թեկնածու ընտրվեց Ռուբեն Ռուբինյանը, ով ԶԼՄ-ների ներկայացուցիչների հետ հանդիպմանը նշեց. «Շոյված եմ արդյունքից և վստահությունն ինձ համար շատ պարտավորեցնող է: Չեմ կարող ասել, որ ինչ-որ բան պետք է ավելի լավ անեմ, քան նախորդ նախագահը կամ մյուս թեկնածուները: Ես կարծում եմ, որ պարոն Սիմոնյանը շատ լավ Ազգային ժողովի նախագահ է եղել և պարոն Կոնջորյանը փայլուն խմբակցության ղեկավար է եղել»: