Ֆինանսների նախարարությունն այսուհետ ավելի հեշտ կհավաքագրի պայմանական պարտավորությունների մասին տեղեկատվությունը

Մեր գանձապետական համակարգում կա պահանջ, որ երբ պետությունը պայմանագրային պարտավորություն է ստանձնում կամ համաձանագիր, որը պայմանագրային պարտավորություն կարող է պարունակել, ապա այդ պայմանագրային պարտավորությունը պետք է գրանցվի գանձապետարանում, այլապես այն գոյություն չունի: Այս մասին նախագիծն Ազգային ժողովի նիստին առաջին ընթերցմամբ ներկայացնելիս ասաց ՀՀ ֆինանսների նախարարի տեղակալ, հիմնական զեկուցող Ավագ Ավանեսյանը:

Ըստ հիմնական զեկուցողի՝ այդ պայմանական պարտավորություն պարունակող պայմանագրերը նորից ենթակա են գրանցվելու գանձապետարանում:

«Եվս մի մաս. եթե նկատել եք՝ բյուջետային զեկույցներում և միջնաժամկետ ծախսային ծրագրում ներառում ենք սպեցիֆիկ ֆիսկալ ռիսկերի մասին զեկույցը, որը ներկայումս տարածաշրջանում լավերից է գնահատվում: Սակայն այդ ներառումը միշտ եղել է ավելի շատ Կառավարության բարի կամքի դրսևորում, և քանի որ մենք կարող ենք հիմա արդեն պնդել, որ փորձնական շրջանն ավարտվել է, հիմա արդեն պահանջ ենք սահմանում, որի համաձայն՝ համապատասխան տեղեկատվությունը միշտ պետք է ներառել, այսինքն՝ համապատասխան զեկույցներով միշտ պետք է ցույց տալ պայմանական պարտավորությունները, որպեսզի ԱԺ-ն իր հարկաբյուջետային ռիսկերի վերաբերյալ ամբողջությամբ տեղեկացված լինի և բյուջետային որոշումները կայացնի ամբողջական տեղեկատվության պայմաններում:

Նաև մի շարք կարգավորումներ ենք փոխում, որոնց համաձայն՝ ֆինանսների նախարարությունն ավելի հեշտ է կարողանալու հավաքագրել տեղեկատվություն պայմանական պարտավորությունների և ֆիսկալ ռիսկերի մասին, ուստի էականորեն բարձրանալու է ֆիսկալ թափանցիկության մակարդակը»,- ասաց նա: