Կառավարությունը ցանկանում է հեղինակազրկել Սամվել Կարապետյանին․ Ամստերդամ
Այսօր հրավիրված ասուլիսի ժամանակ միջազգային իրավապաշտպան Ռոբերտ Ամստերդամը հայտարարել է, որ գործարար Սամվել Կարապետյանի նկատմամբ ներկայացված նոր մեղադրանքը՝ «փողերի լվացման» վերաբերյալ, որևէ հիմք չունի։
«Սա սովորաբար ավտոկրատ ռեժիմներն օգտագործում են քաղաքական իրենց ընդդիմախոսներին ազատազրկելու համար։ Հունիսի 17-ից առաջ նման մեղադրանք չի եղել, մեկ էլ հանկարծ Հայաստանի ամենամեծ ձեռնարկատերը, Գործարարների միության նախագահը նման մեղադրանքի է արժանանում»,- ասել է Ամստերդամը։
Ամստերդամի խոսքով՝ ինքն աշխատել է աշխարհի տարբեր երկրներում, ներկայում Տանզանիայում ներկայացնում է ընդդիմության շահերը։ Նա կարծում է, որ նույնիսկ տանզանացիները կամաչեին Կարապետյանի գործից։
Ամստերդամը կարծում է, որ կառավարությունը ցանկանում է հեղինակազրկել մեծ ժողովրդականություն վայելող Սամվել Կարապետյանին, քանի որ վախենում է գալիք ընտրություններից։
Նա նաև նշել է՝ դեռ մեղադրանքին չի էլ ծանոթացել, բայց չի էլ կասկածում, որ հիմնազուրկ մի բան է։ Ասում է՝ բավարար է նույնիսկ նայել մեղադրանքի ներկայացման ժամանակահատվածին, և ամեն բան հասկանալի է դառնում։ Իր խոսքով Սամվել Կարապետյանը տասնամյակներ շարունակ գործարարությամբ է զբաղվել, միլիոնավոր դոլարներ է վաստակել, ու հանկարծ հիմա մեղադրվում է «փողերի լվացման», «հեղափոխական լինելու» համար։ Ըստ Ամստերդամի՝ պատճառը պարզ է՝ նրանից պարզապես ցանկանում են ազատվել։
