Թրամփը՝ ռուսական կործանիչների կողմից Էստոնիայի օդային տարածքը խախտելու մասին

ԱՄՆ նախագահ Դոնալդ Թրամփը հայտարարել է, որ դժգոհ է երեք ռուսական կործանիչների կողմից Էստոնիայի օդային տարածքը խախտելու մասին հաղորդումներից․ հաղորդում է Reuters-ը։ 

Սպիտակ տանը լրագրողների հարցերին պատասխանելով՝ Թրամփը նշել է, որ շուտով կտեղեկացվի միջադեպի մանրամասների մասին: ԱՄՆ առաջնորդին նաև հարցրել են, թե արդյոք նա ռուսական ինքնաթիռի ներխուժումը համարում է ՆԱՏՕ-ի համար սպառնալիք:

«Ինձ դա դուր չի գալիս: Ինձ դուր չի գալիս, երբ դա տեղի է ունենում: Դա կարող է մեծ խնդիր լինել», - պատասխանել է նա։

Հավելենք՝ Բալթյան պետության գլխավոր շտաբը միջադեպի մասին հաղորդել էր նախորդ օրը։ Մասնավորապես,  Էստոնիայի գլխավոր շտաբը հայտարարել էր, որ երեք ռուսական կործանիչներ խախտել են Էստոնիայի օդային տարածքը Բալթիկ ծովի Ֆիննական ծոցի Վայնդլո կղզու մոտ: Միջադեպից հետո Էստոնիայում Ռուսաստանի գործերի ժամանակավոր հավատարմատարը կանչվել է Արտաքին գործերի նախարարություն և նրան բողոքի նոտա է հանձնվել։