Հնդկաստանը պետք է դադարեցնի ռուսական նավթ գնելը. ԱՄՆ առևտրի նախարար
Ամերիկայի Միացյալ Նահանգները կարող է առևտրային համաձայնագիր կնքել Հնդկաստանի հետ, երբ վերջինս դադարեցնի ռուսական նավթ գնելը։ Այս մասին հայտարարել է ԱՄՆ առևտրի նախարար Հովարդ Լուտնիկը։
«Մենք պատրաստվում ենք կարգավորել այդ հարցը Հնդկաստանի հետ: Հնդկաստանը, որպես ամբողջություն, պետք է բացի իր շուկան և դադարեցնի ռուսական նավթ գնելը: Կարծում եմ՝ ամեն ինչ կլուծվի, երբ նրանք դադարեցնեն ռուսական նավթ գնելը»,- ասել է նախարարը:
Հավելենք՝ Միացյալ Նահանգները Հնդկաստանի նկատմամբ սահմանել է լրացուցիչ 25% մաքսատուրքեր՝ կապված ռուսական նավթի և նավթամթերքի գնման հետ։ Այսպիսով, հնդկական ապրանքների և ծառայությունների ներմուծման մաքսատուրքերը բարձրացվեցին մինչև 50%։ Հնդկաստանի արտաքին գործերի նախարարությունը այս գործողությունները անվանել է անարդար։
