ԿԲ նախագահը՝ արցախցիներին վարկ չտրամադրելու մասին
ԱԺ նիստում «Հայաստան» խմբակցության պատգամավոր Գառնիկ Դանիելյանը հարց բարձրացրեց Արցախից բռնի տեղահանված քաղաքացիների խնդիրների վերաբերյալ՝ մասնավորապես ԱՊՊԱ պայմանագրերի կնքման և բանկերից վարկ ստանալու հնարավորությունների հետ կապված։
Պատգամավորը նշեց, որ մի շարք քաղաքացիներ բախվում են խոչընդոտների ԱՊՊԱ-ների հետ կապված: «Ապահովագրական ընկերությունները պնդում են, որ Կենտրոնական բանկը թույլ չի տալիս ԱՊՊԱ պայմանագրեր կնքել»,- ասաց նա:
Ի պատասխան Գրիգորյանը նշեց, որ խնդրից տեղյակ չէ և առաջարկեց պատգամավորին տրամադրել կոնկրետ դեպքերի վերաբերյալ տեղեկատվություն, որպեսզի ԿԲ-ն կարողանա հետամուտ լինել և նպաստել դրանց լուծմանը։
Դանիելյանը նշեց, որ կտրամադրի այդ տեղեկությունները և շեշտեց, որ շատ բանկեր հրաժարվում են արցախցիներին վարկ տրամադրելուց՝ պատճառաբանելով, թե նրանք նախկինում Արցախում ունեցել են վարկային պարտավորություններ։
«Ի՞նչ գործիքակազմ կարող է կիրառել Կենտրոնական բանկը, որպեսզի այս մարդիկ հնարավորություն ունենան այստեղ վարկ ստանալու և չզրկվեն իրենց ֆինանսական աջակցության հնարավորություններից»,- հարցրեց պատգամավորը։
ԿԲ նախագահ Մարտին Գալստյանը կարևոր համարեց բարձրացված հարցը՝ ընդգծելով, որ բանկային համակարգը վերջին տարիներին մեծ զիջումներ է արել պատերազմի և տեղահանման հետևանքով դժվարությունների առաջ կանգնած քաղաքացիներին։
«Մեր դիտարկումներով և բանկերի հետ աշխատանքով համակարգային խնդիր չենք տեսնում։ Բանկային համակարգը միլիարդավոր դրամների զիջումներ է արել թե՛ պատերազմի մասնակիցներին, թե՛ զոհվածների ընտանիքներին, հաշմանդամներին, վիրավորներին, և նաև Արցախից տեղահանված մեր հայրենակիցներին։ Բայց, իհարկե, դա չի նշանակում, որ չեն կարող լինել անհատական դեպքեր, որոնք պետք է դիտարկվեն առանձին ու լուծում ստանան»,– ասաց Գալստյանը։
