45 միլիոնանոց Հայաստանն ընդդեմ 849 միլիոնանոց Պորտուգալիայի

Ֆուտբոլի Հայաստանի ազգային հավաքականը վաղը կսկսի պայքարն աշխարհի առաջնության ընտրական փուլում Վազգեն Սարգսյանի անվան «Հանրապետական» մարզադաշտում մրցելով աշխարհի ուժեղագույն հավաքականներից` Պորտուգալիայի հետ:

Մասնագետներն ըստ էության անհավանական են համարում մեր ազգային թիմի դրական արդյունքի հասնելը, դիմակայության անվիճելի ֆավորիտ համարելով հյուրերին: Համեմատության համար նշենք, որ «Տրանսֆերմարկետ» պարբերականի տվյալներով, Հայաստանի դեմ խաղին հրավիրված 23 ֆուտբոլիստների տրանսֆերային ընդհանուր արժեքը կազմում է 849 միլիոն եվրո: Մինչդեռ Հայաստանի ազգային հավաքականի 27 ֆուտբոլիստների տրանսֆերային հանրագումարը 45 միլիոն եվրո է: Այս պահին Պորտուգալիայի հավաքականի ամենաթանկ ֆուտբոլիստներն են ՊՍԺ-ի կիսապաշտպաններ Ժոաու Նևեշը և Վիտինյան: Նրանց տրանսֆերային արժեքը 80-ական միլիոն եվրո է: Պորտուգալիայի հավաքականի ավագ Կրիշտիանու Ռոնալդուի տրանսֆերային արժեքը 12 միլիոն եվրո է: Պորտուգալիայից ամենացածր տրանսֆերային արժեքն ունի Լիսաբոնի «Սպորտինգի» դարպասապահ Ռուի Սիլվան` 7 միլիոն եվրո:

Նշենք, որ Հայաստանի ազգային հավաքականի հրավիրված միայն 7 ֆուտբոլիստներ ունեն մեկ միլիոն և ավելի տրանսֆերային արժեք: Մեր ազգային թիմի ամենաթանկ ֆուտբոլիստը Կրասնոդարի կիսապաշտպան Էդուարդ Սպերցյանն է, որի տրանսֆերային արժեքը կազմում է 25 միլիոն եվրո: Այս հաշվարկում Սպերցյանին հաջորդում է «Ցրվենա Զվեզդայի» պաշտպան Նայիր Թիկնիզյանը 4 միլիոն եվրո տրանսֆերային արժեքով: Արգենտինական «Ատլետիկո Բելգրանոյի» կիսապաշտան Լուկաս Սելարայանի տրանսֆերային գինը` 3 միլիոն եվրո է: