Հայաստանի իշխանություններն Ադրբեջանի և Թուրքիայի հետ ամեն ինչ անում են Արցախի էջը փակելու համար. Սաղաթելյան
Հայաստանի իշխանությունները ոչ միայն արցախցիների՝ Արցախ վերադարձի հնարավորություն չեն տեսնում, այլև Ադրբեջանի և Թուրքիայի հետ միասին ամեն ինչ անում են Արցախի էջը ամբողջովին փակելու համար, «Արցախ․ չկարգավորված հակամարտություն, վերադարձի իրավունք» միջազգային խորհրդաժողովի ընթացքում լրագրողների հետ զրույցում հայտնել է ՀՅԴ ԳՄ անդամ Իշխան Սաղաթելյանը։
«Մենք ասում ենք, որ ուժի սպառնալիքով, էթնիկ զտման և ցեղասպանության գործադրմամբ չի կարող լինել խաղաղություն, և այդ ճանապարհով ձեռք բերված ցանկացած փաստաթուղթ չունի ոչ իրավական, ոչ էլ քաղաքական լեգիտիմություն։ Այո՛, այս իշխանության գործունեության հետևանքով մենք պատերազմում պարտություն ենք կրել, հետո այս իշխանության մեղսակցությամբ հայաթափվել է Արցախը, բայց դա չի նշանակում, որ պետք է այս էջը փակենք և ամեն ինչ ուրանանք։
Մենք ասում ենք, որ արցախահայերի վերադարձի և ինքնորոշման իրավունքը պետք է սրբորեն պահպանվի, և դա պետք է դառնա ազգային և միջազգային օրակարգ։ Միայն այդ ճանապարհով է հնարավոր, որ տարածաշրջանում լինի խաղաղություն և կայունություն։ Դրա հնարավորությունը կա»,-նշել է Իշխան Սաղաթելյանը։
