Սեպտեմբերի 1–ից ՍԱՏՄ–ն խստագույնս կստուգի Հայաստանից արտահանվող ծաղիկների խմբաքանակները
Սեպտեմբերի 1–ից ՀՀ սննդամթերքի անվտանգության տեսչական մարմինը կսկսի խստագույնս ստուգել արտահանվող ծաղիկների խմբաքանակները: Այս մասին այսօր լրագրողների հետ հանդիպմանն ասաց ՀՀ սննդամթերքի անվտանգության տեսչական մարմնի բուսասանիտարական վարչության պետ Արթուր Նիկոյանը։
Ռոսսելխոզնադզորը հունիսի 16-ին հայտնել էր, որ 2025 թվականի հունիսին Հայաստանից Ռուսաստան մատակարարված ծաղիկների 80 խմբաքանակներից 78-ում խախտումներ են եղել։ Կազմակերպությունը լուրջ մտահոգություն էր հայտնել Հայաստանից ներկրվող ծաղիկների ծավալների կտրուկ աճի և բույսերում կարանտինային օբյեկտների հայտնաբերման դեպքերի կապակցությամբ:
«Վերջին մի քանի օրերին ռուսական կողմը կրկին հարցեր էր ուղղում մեզ արտահանվող ծաղիկների վերաբերյալ, բայց մենք խնդրեցինք սպասել մինչև սեպտեմբերի 1–ը ու ասացինք, որ մենք ինքներս ենք շատ խիստ լինելու։ Դրանից հետո թող ոչ մի արտահանող չբողոքարկի, որ ինքը դիմել է տեսչությանը, իսկ իրեն բուսասանիտարական սերտիֆիկատ չեն տվել»,– հայտարարեց Նիկոյանը։
Նա տեղեկացրեց, որ ռուսական կողմի հետ առցանց ստուգում են անցկացրել, որի արդյունքում բավականին արագ կարողացել են ստուգել ջերմատներն ու փուլ առ փուլ թույլատրել ծաղկի արտահանումը։
Հիշեցնենք, որ ռուսական կողմը ծաղկի արտահանման հետ կապված 3 հիմնական խնդիր էր բարձրաձայնել՝ կասկածներ, որ Ռուսաստան են արտահանվում երրորդ երկրից Հայաստան ներմուծված ծաղիկներ, հարկերից խուսափելու համար արտահանում է իրականացվում մեկօրյա ընկերությունների միջոցով և վնասատու օրգանիզմների առկայություն։
