Զախարովան հայտնել է, թե ինչ է ակնկալում Ռուսաստանը ԱՄՆ-ից
Մոսկվան սպասում է, որ Վաշինգտոնը նոր առաջարկներ կանի ռուս-ամերիկյան հարաբերությունների խնդրահարույց հարցերի շուրջ երկխոսությունը շարունակելու համար։ Այս մասին Սանկտ Պետերբուրգի միջազգային տնտեսական ֆորումում ՌԻԱ Նովոստիին տված հարցազրույցում հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան։
Նա ասել է, որ երկու երկրների միջև գործում է այսպես կոչված «խանգարող գրգռիչների» վերաբերյալ խորհրդակցությունների մեխանիզմ։ Նրա խոսքով՝ արդեն տեղի է ունեցել բանակցությունների երկու փուլ, իսկ երրորդը նախատեսված էր, սակայն Միացյալ Նահանգները հայտարարել է, որ չի կարող մասնակցել քննարկումներին նախապես համաձայնեցված ժամին։ Այժմ, ինչպես նշել է Զախարովան, շփումները շարունակվում են, և Մոսկվան սպասում է, որ ամերիկյան կողմը կորոշի հանդիպման նոր ամսաթվեր։
Դիվանագետը նաև հիշեցրել է, որ փոխգործակցությունը շարունակվում է այլ ուղիներով՝ դեսպանատների, ինչպես նաև պետությունների ղեկավարների և արտաքին քաղաքականության գերատեսչությունների ղեկավարների միջև հեռախոսազրույցների միջոցով։
