Միջուկային օբյեկտների ռմբակոծումը տեղի չի ունենա․ մեր պայմաններին համաձայնել են․ Թրամփ
ԱՄՆ նախագահ Դոնալդ Թրամփը հայտարարել է, որ ԱՄՆ-ն և Իրանը մոտ են Թեհրանի միջուկային ծրագրի շուրջ համաձայնության կնքմանը։ Այս մասին գրում է «ՏԱՍՍ»-ը:
«Դուք հավանաբար արդեն կարդացել եք, որ Իրանը համաձայնել է այնպիսի պայմանների, որոնց դեպքում մենք բարեկամական մոտեցում կդրսևորենք և ռադիոակտիվ փոշի չենք ստեղծի Իրանում, այսինքն միջուկային օբյեկտների ռմբակոծումը տեղի չի ունենա։ Ես ցանկանում եմ, որ նրանց համար ամեն ինչ լավ լինի։ Իրանը մեծ երկիր է, բայց չի կարող միջուկային զենք ունենալ։ Դա պարզ է: Ոչ մի 30 էջանոց փաստաթուղթ, ընդամենը մեկ նախադասություն՝ նրանք չեն կարող միջուկային զենք ունենալ։ Կարծում եմ, որ մենք մոտ ենք գործարքին: Մենք Իրանի հետ շատ լուրջ բանակցությունների մեջ ենք երկարաժամկետ խաղաղություն հաստատելու համար»,- ասել է Թրամփը ։
Սպիտակ տան ղեկավարը հավելել է, որ կցանկանար իրանական միջուկային ծրագրի շուրջ ստեղծված ճգնաժամը լուծել «խելամիտ, ոչ թե կոշտ ձևով»։
Թրամփը նաև հավելել, որ չի ցանկանում դիմել «չտեսնված բռնության» և նախընտրում է «ճիշտ ճանապարհը»։
Հավելենք՝ Միացյալ Նահանգները և Իրանը, Օմանի միջնորդությամբ, բանակցությունների չորս փուլ են անցկացրել՝ լուծելու Իսլամական Հանրապետության միջուկային ծրագրի շուրջ տարաձայնությունները:
