Հրապարակվել է Պուտինի կողմից Թրամփին նվիրված դիմանկարը

Հրապարակվել է դիմանկարը, որը ՌԴ նախագահ Վլադիմիր Պուտինը մարտին նվիրել էր ԱՄՆ նախագահ Դոնալդ Թրամփին: Այն հրապարակել է ամերիկյան CNN հեռուստաալիքը:

Նշվում է, որ նկարի հեղինակը ժողովրդական նկարիչ Նիկաս Սաֆրոնովն է: Այն ՌԴ-ից բերել էր Թրամփի հատուկ ներկայացուցիչ Սթիվեն Ուիտկոֆը, որի բառերով՝ այն «ռուս առաջատար նկարչի վրձնի գեղեցիկ դիմանկար» է:

Նկարում ԱՄՆ նախագահը պատկերված է բռունցքը վեր բարձրացրած և դեմքին արյան հետքեր՝ որպես 2024 թվականի հուլիսի 13-ին Փենսիլվանիայում նախընտրական ելույթի ժամանակ նրա դեմ մահափորձի հիշեցում։ Թրամփի թիկունքին ծածանվում է ամերիկյան դրոշը, իսկ նկարի ֆոնին երևում է Ազատության արձանը և Նյու Յորքի Մանհեթեն թաղամասը:

«Ինձ համար կարևոր էր պատկերել մահափորձի պահին նրա խիզախությունը։ Նա ո՛չ կոտրվեց, ո՛չ էլ վախեցավ, այլ բարձրացրեց ձեռքը և ցույց տվեց, որ ինքը Ամերիկայի հետ միասնական է և կվերադարձնի երկրին այն, ինչին արժանի է ԱՄՆ-ն», -  հեռուստաալիքին տված հարցազրույցում ասել է Սաֆրոնովը։

Նկարչի խոսքով՝ դիմանկարի պատվերն ստանալուց հետո անմիջապես հասկացել է, որ այդ աշխատանքը կարող է օգնել երկու երկրների մերձեցմանը, ուստի իր աշխատանքի համար փող չի ուզել: