Ինչ ազդանշան է Պուտինն ուղարկել Թրամփին ու Ուիթքոֆին. NYT

Ռուսաստանի նախագահ Վլադիմիր Պուտինը, չնայած ԱՄՆ նախագահ Դոնալդ Թրամփի և նրա հատուկ բանագնաց Սթիվ Ուիթքոֆի հետ «երկար ժամեր տևած զրույցներին», հասկացրել է, որ Ռուսաստանը կշարունակի իր գործունեությունը, քանի դեռ չի հասել ավելի լայն նպատակների, այդ թվում՝ ՆԱՏՕ-ի ընդլայնումը թույլ չտալու համար: Այս մասին գրում է The New York Times թերթը՝ հղում անելով Կրեմլին մոտ կանգնած աղբյուրին:

Պարբերականը նաև հղում է անում «Կառավարությանը մոտ կանգնած վերլուծաբանին», որի խոսքով՝ Ռուսաստանի առաջնորդը «դեռ պետք է դրսևորի ճկունություն, որն իրենից ի սկզբանե սպասում էին» տարածքային հարցերում:

Միևնույն ժամանակ փորձագետը նշել է, որ Կրեմլը փորձում է «դիվերսիֆիկացնել բանակցությունների պորտֆելը» Միացյալ Նահանգների հետ՝ ներառելով այնպիսի հարցեր, ինչպիսիք են էներգետիկան, Արկտիկան և տիեզերական թռիչքները, որպեսզի Վաշինգտոնի հետ մերձեցումը շարունակվի, նույնիսկ եթե Ուկրաինայի շուրջ բանակցությունները ձախողվեն:

Մինչ այդ CNN-ը հայտնել էր, որ ամերիկյան վարչակազմը նախատեսում է ԱՄՆ նախագահ Դոնալդ Թրամփի հատուկ բանագնաց Սթիվեն Ուիթկոֆի ևս մեկ հանդիպում կազմակերպել Ռուսաստանի ներկայացուցիչների հետ: Լրատվամիջոցի տվյալներով՝ այդ բանակցություններում խոսքը պետք է գնա Ուկրաինայում հակամարտության կարգավորման շուրջ համաձայնագրի քննարկման մասին։