Սպառնացել է սպանել Թրամփին և Մասկին. հայտարարություն

ԱՄՆ արդարադատության նախարարությունը տարածել է հայտարարություն, որի համաձայն Փենսիլվանիա նահանգում ձերբակալվել է մի տղամարդ, որը հայտարարել էր ԱՄՆ նախագահ Դոնալդ Թրամփին սպանելու մտադրության մասին։

Ամերիկյան իշխանությունների տվյալներով՝ տղամարդը ձերբակալվել է Բաթլերում՝ այն նույն տեղում, որտեղ նախորդ տարի Թրամփի հանրահավաքի ժամանակ Թոմաս Քրուքսը կրակել էր և վիրավորել այդ ժամանակ նախկին նախագահին։ Այս անգամ ձերբակալվել է 32-ամյա Շոն Մոնպերը։

Նրա նկատմամբ ներկայացվել է մեղադրանք՝ ԱՄՆ նախագահի և մի շարք այլ պաշտոնյաների հասցեին սպառնալիքներ հնչեցնելու համար։ Ըստ հաղորդման՝ փետրվարի 17-ին նա հայտարարել է. «Պետք չէ երկար մտածել, պետք է պարզապես սկսել մարդկանց սպանել՝ Թրամփին, Իլոնին, բոլոր գործակալությունների ղեկավարներին, որոնք նշանակվել են Թրամփի կողմից, և բոլոր նրանց, ովքեր կանգնած են ճանապարհին»։

Նա նաև կոչ էր արել «Ամերիկյան հեղափոխություն 2.0»-ի։

Մարտի 4-ին Մոնպերը YouTube-ում հրապարակել է տեսանյութ, որտեղ ասել է. «Ես ինքս կսպանեմ նրան»։  Տեսանյութը վերնագրված է եղել «Ուղիղ եթեր. Թրամփի ուղերձը Կոնգրեսին»։

Այս պահին պարզ չէ, թե որքան լուրջ են եղել Շոն Մոնպերի սպառնալիքները ԱՄՆ նախագահի հասցեին։