Հայաստանն ու Իրանը պատրաստ են համագործակցել զենքի, հետախուզության և այլ ասպեկտներում

Հայաստանն ու Իրանը պատրաստ են հաստատել համագործակցություն զենքի մատակարարման, հետախուզական տվյալների փոխանակման և անվտանգության այլ ասպեկտներում։ Այս մասին ապրիլի 3-ին լրագրողների հետ զրույցում հայտարարել է «Հայաստան-Իրան համագործակցության զարգացման» հիմնադրամի ղեկավար Պույա Հոսեյնին։

«Իրանը պատրաստ է աջակցություն ցուցաբերել Հայաստանին։ Երրորդ կողմերը, որոնք խոչընդոտում են մեր հարաբերություններին (այդ թվում՝ արևմտյան երկրները), չպետք է միջամտեն»,- նշել է նա։

Հոսեյնին ընդգծել է, որ Հայաստանի և Իրանի միջև ապրանքաշրջանառությունը 300 միլիոն դոլարից հասել է 700 միլիոն դոլարի, և երկու երկրներն էլ նախատեսում են այդ թիվը հասցնել 1 միլիարդ դոլարի, իսկ հետագայում՝ 3 միլիարդ դոլարի։