Խանդանյանն անդրադարձել է Ալիևի հայտարարությանը
Ես կարծում եմ՝ չարժե մտնել բառախաղի մեջ՝ նոր նախապայմաններ, հին նախապայմաններ, դրանք կան եւ դրանք նախապայմաններ են: Այս մասին ԱԺ-ում լրագրողների հետ զրույցում հայտնել է ՔՊ-ական պատգամավոր, ԱԺ արտաքին հարաբերությունների հանձնաժողովի նախագահ Սարգիս Խանդանյանն՝ անդրադառնալով Ալիևի հայտարարությանը, թե սահմանադրություն փոխելու և Մինսկի խումբը լուծարելու պահանջները նոր չէ, դրանք եղել են 2,5 տարի:
«Մեր դիրքորոշումներն այդ հարցերով շատ հստակ է. խաղաղության պայմանագիրը ամբողջությամբ լուծում է սահմանադրության խնդիրը, եթե այդպիսի խնդիր նույնիսկ լիներ, իսկ մենք հավատում ենք, որ այդպիսի խնդիր չկա: Իսկ ԵԱՀԿ Մինսկի խմբի մասով մենք ասել ենք, որ այո, պատրաստ ենք դիմել ԵԱՀԿ Մինսկի խումբը լուծարելու՝ ստորագրմանը զուգահեռ կամ ստորագրումից հետո: Պետք է այսպես ասած ինստիտուցիոնալ խաղաղություն առնվազն հաստատվի, ինչ-որ փաստաթուղթ լինի խաղաղության վերաբերյալ, որը հնարավորություն կտա կոնֆլիկտի լուծման վերաբերող մեխանիզմներից հրաժարվել։
Իսկ ինչպե՞ս կհանգուցալուծվի, ժամանակը ցույց կտա, բանակցությունները ցույց կտա, այնուամենայնիվ մենք փորձում ենք բոլորի ուշադրությունը գրավել, որ հիմա է այդ պահը»,-նշել է նա:
Դիտարկմանը, որ հիմա հայտարարվում է, որ նոր Սահմանադրությունը պետք է լինի խաղաղության գործընթացին չվնասող, իսկ առաջ նման բան չէր հայտարարվում, Խանդանյանն ասել է. «Ես հակասություն չեմ տեսնում այն մտքի, որ նոր սահմանադրության տեքսը չպետք է լինի խաղաղությանը հակասող և որ սահմանադրական փոփոխությունների հարցը Հայաստանի ներքին գործն է: Այդտեղ որևէ հակասություն չկա: Բնականաբար, Սահմանադրությունը պետք է լինի իրական Հայաստանի մասին։ Ինչ վերաբերում է նրան, թե որ փուլում ինչ նպատակներով ենք Սահմանադրությունը ցանկացել փոխել, հիմնական նպատակը միշտ եղել է այն, որ Սահմանադրության ընդունման պրոցեսները Հայաստանում միշտ լեգիտիմության հարցեր են առաջացրել»:
